ano ang ibig sabihin ng Allah?

Ang salitang Allah ay wikang arabik, at para sa mga arabo at hindi mga arabo, muslim man o hindi, na nakakaunawa ng wikang arabik, ang salitang ito ay tumutukoy bilang pantangi at walang katulad na pangalan ng Tunay at Iisang nararapat na pag-ukulan ng dalisay na pananampalataya at pagsamba kaakibat ng pagpapasakop, pagsuko at pagtalima sa kanyang mga Batas at Kautusan. Kung ang salitang ito ay isasalin sa ibang wika tulad ng wikang Pilipino o Ingles, tunay na hindi makararating ang sinumang makababasa sa tunay kahulugan na nais nitong (Allah,bilang salita) iparating. Malimit nating makita sa mga pagsasalin ng mga artikulong pang-Islam na kapag isinalin ang salitang Allah ito ay nagiging Diyos sa wikang Pilipino, at God naman sa wikang Ingles. Gayunman, ang pagtatangkang ito sa pagsasalin ay isa o kabilang lamang sa mga posibleng pamamaraan upang madaling matukoy kung sino o kanino nauukol ang salita subalit hindi nangangahulugang iyon na ang eksaktong kahulugan nito. Ito ay sapagkat kailanman ay hindi maaaring isalin sa ibang wika ang salitang Allah, gayundin ang iba pang mga termino na ginagamit ng Islam sa pagpaparating nito ng kanyang mensahe sa sangkatauhan. Higit na makabubuting unawain na lamang ang salita sa tunay at wastong kahulugan nito na mismong ang Islam din ang magpapaliwanag sa pamamagitan ng mga pinagtibay na mga ebidensiya o pagpapatunay tulad ng Quran at Sunnah o Tradisyon ng Propetang si Muhammad, sumakanya ang kapayapaan.