"Manang Kasalanan"

Tila isang anghel buhat ng ako’y iluwal, Mukha sa magulang ngiti ay pantal, sabik ipagkalat aking pagdatal, Panay pasasalamat doon sa may kapal. Nguni’t ano itong sa aki’y inakusa, Isang kasalanang sabi ay minana? Kararating ko lang ako’y dungis na, sa isang kasalanang di ko ginawa. Aking pinagsikapan mamuhay ng marangal, Lahat pinag-ingatan maging aking dangal, Nagbalat ng buto at sa Dios ay nagdasal, ngunit manang kasalanan lang ang tumapal. Makatarungan nga bang ako ay dungisan, at ako’y papanagutin sa di ko kasalanan? saan nga ba nakuha ang ganitong katuruan, upang lapastanganin aking kadalisayan? Ngunit ito nga ba ay suportado ng Libro (Bible), o baka naman ito’y doktrina lang ng tao? sa lumang tipan nakatalang parurusahan tayo, sa sariling kamaliang nagawa sa mundo. Noon tila anghel ba’t ngayo’y inaakusahan, At sa aki’y pinagpipilitan ang manang kasalanan, Ang sabi’y nakatala daw ito sa bagong tipan, aba akala ko bay banal ba’t nagkokontrahan? Ang sabi ng iba “kaya bago nga diba?” ngunit sabi ni kristo kasulatan ay iisa, hanggat ang kalangita’t kalupaa’y mangawala, ni isang kudlit sa kasulata’y di magigiba.