"Tela"

Isang dalagita ang maaalaala Tunghayan natin ang kwento niya Batang musmos ngunit ida’y sapat na Upang tama at mali’y kanyang makilala Andres, isang mababang paaralan Bida’y tinatawag sa ibang pangalan Pagtataka ay nasa sa kanya “Abu Sayaf” kung kanilang tawagin siya Halakhakan ay papailanlang Kanilang tigna’y ibang nilalang Maaari bang siya’y inyong pagmasdan Ano bang iba maliban sa kasuotan? Telang bumabalot sa knya’y naging tampulan Ng kanila mga pangungutya at tawanan Pagsunod sa kautusan kailan naging kasalanan? Sa kanilang ibang relihiyo’y ginagalang naman Mga pangyayari malinaw pa sa alaala Mga Muslim nais ipalaganap dala nila Ngunit ano ito sila’y biglang naglaho? Kinuha, hinila, dinala sa malayo Musmos niyang isipan ay nagtataka Sa palabas ay kilala, di naman artista Mga Muslim, nagpapalaganap ng dala Sila ngayon daw ay terorista’t nasa selda Isang umaga sa kaniyang pag-iisa May kumatok, sila’y nagpakilala Jehova ni Cristo, nais magpalaganap ng dala Bakit sila’y malaya gawin misyon nila? Sa paligid kay daming simbahan Ng mga Katoliko’t naglalakihan Ngunit bakit Muslim? Sa kanya’y palaisipan. Salat sa bahay panalanginan Sa paglipas ng panahon, sakanyang paglaki Paligid tumahimik, Masjid ay dumami Nagpapalaganap na Muslim di na hinuhuli Sa akusasyong terorista hindi na kasali Nakasisindak ito ngayong mga ganap Bumabalik ba ang dating alapaap Pagsabog kabikabila na naman Muslim umano ang may kinalaman Sa kanyang paglaki naintindihan Kung ito’y kabilang sa kanilang kautusan Marahil wala nang natira sila sila na lamang Telang kasuotan niya’y kailanma’y di makapapaslang Sino nga bang may kasalanan? Nang mga kaguluhang di mabilang? Ang tanging alam niya lamang Kapayapaan, sa Islam ay katuruan